top of page
  • Writer's pictureKathy Lam

閨蜜

女人總有一些閨蜜,事無大小都分享下,買邊個袋,買邊雙鞋,試著影相大家畀意見,投票決定買邊樣,大家老實不客氣話唔好睇、太貴,或者另一間舖頭有特價,借埋個會員號碼去取折;然後,滿載而歸影幅相畀大家,多謝閨蜜們給予意見。


閨蜜也是團購的化身,因為大家建立信任,有咩好一定互相分享,一齊買一齊打折,個個開心。聽人講邊隻邊隻產品正,閨蜜們又搜集資料,打價,集體訂貨,用後分享,視頻示範(講明不外傳),好醜正反面中肯到一定信。遇著其中一個閨蜜去旅行,自然清單一張,互相幫忙入貨,唔怕煩,如果爆自然會出聲,非常有默契。


由於科技發達,手機聯繫一日千里,閨蜜的更新資料勁過電台電視台,睇場戲出來竟然有過百訊息,好坦白加句:喂,真係追唔切。閨蜜馬上回覆:無聊,無時間就skip,mark 住留言紀錄數字,大家笑言下次再破紀錄。


閨蜜中偶然會感性分享,傷心失意困難,畀仔女畀老公激親,發洩幾句,如有特別敏感話題,單獨私訊閨蜜,關心一下,讓彼此鼓勵支持。


閨蜜不會也不能日日見,但會每隔幾個月聚一聚,交換貨品(之前團購嘛),集體shopping等等,在酒店餐廳high tea嘈到你唔信。


閨蜜是用時間推砌出來的關係,許多是中學,甚至小學,失散多年,重聚在一起。大家老了,成熟了,已不再把工作放在人生第一位,加上子女開始升中畢業唔再理你的時候,人自然會把人與人的關係重視及重建起來。


有一天,大家退休時,可能又回到學生時年青時一齊去玩去旅行的日子。你說沒了閨蜜怎算好。人生就是如此有趣。



Kathy Lam林慧怡


(轉載自《Recruit》專欄)

0 views0 comments

Recent Posts

See All

Commentaires


bottom of page